काठमाडौं– ६० हजार घुसमा बार्गेनिङ गर्ने नायव सुब्बाविरुद्ध अख्तियार दुरुपयोग अनुसन्धान आयोगले १५ हजार रुपैयाँ बिगो दाबी गर्दै भ्रष्टाचार मुद्दा दायर गरेको छ ।

जिल्ला अदालत पश्चिम रुकुम (रुकुमकोट)मा कार्यरत नायव सुब्बा रमेशकुमार खड्काविरुद्ध अख्तियारले शुक्रबार विशेष अदालत काठमाडौंमा अभियोग पत्र दायर गरेको हो ।

अदालतबाट फैसला भइसकेको मुद्दामा मालपोत कार्यालयलाइृ जग्गा दाखिल खारेज दर्ता पूर्जि उपलब्ध गराउने कामका लागि नासु खड्काले सेवाग्राहीसँग ६० हजार घुस मागेका थिए ।

सेवाग्राहीले ६० हजार रुपैयाँ घुस दिन नसक्ने जनाएपछि बार्गेनिङ गर्दा गर्दै १५ हजारसम्म पुगेको थियो ।

सेवाग्राहीले नासु खड्काबाट घुस रकम माग भएको विषय अख्तियार दुरुपयोग अनुसन्धान आयोगमा जानकारी गराएपछि खड्का पक्राउ परेका थिए ।

खड्कालाई अख्तियार दुरुपयोग अनुसन्धान आयोगको टोलीले १५ हजार रुपैयाँ घुससहित पक्राउ गरेको थियो ।

अख्तियारले खड्काविरुद्ध १५ हजार रुपैयाँ बिगो कायम गर्दै बिगो अनुसारको जरिवाना र ३ महिनासम्म कैद सजाय मागदाबी गर्दै विशेष अदालतमा मुद्दा दायर गरेको छ ।