काठमाडौं– चितवन मेडिकल कलेज (सीएमसी) मा आइतबार भएको तोडफोड र हुलदंगाको विषयमा गैर सरकारी चिकित्सक संघले भर्त्सना गरेको छ ।
संघले सोमबार विज्ञप्ति जारी गर्दै अस्पताल जस्तो संवेदनशील क्षेत्रमा लापरबाहीको कारण देखाउँदै चिकित्सक र स्वस्थ्यकर्मीमाथि अमानवीय व्यवहार भएको बताएको छ ।
संघले अस्पतालमा तोडफोड गर्नेमाथि ‘जेल विदआउट बेल’को नियम अनुसार कानूनी कारबाही गर्नुपर्ने माग समेत गरेको छ ।
नवलपुरको कावासोतीकी ३१ वर्षीया आशा ज्ञवालीको नाकको शल्यक्रिया गराउने क्रममा मृत्यु भएको थियो ।
अस्पतालको लापरबाहीका कारण ज्यान गएको पारिवारले दाबी गरेको छ । मृतक आशाका श्रीमान् पुकनारायण ज्ञवालीले अस्पतालको लापरवबाहीका कारण आफ्नो श्रीमतीको ज्यान गएको बताए । डाक्टरको सल्लाह अनुसार नै नाकको शल्यक्रिया गर्न अस्पताल आएको मृतकका श्रीमान् पुकनारायणले बताए ।
दुई महिना अघि चिकित्सकले दिएको सल्लाहअनुसार नै गत असोज २६ गते आशालाई अस्पातल ल्याइएको थियो । शल्यक्रिया अघि सबै परीक्षण गरेर २७ गते बिहान करीब ९ बजेको समयमा शल्यक्रियाका लागि अस्पताल लगिएको थियो ।
अस्पातलले शनिबार अपराह्न करीब ४ बजे आशाको मृत्यु भएको भनि जानकारी गराएको थियो । अस्पतालका निर्देशक डा दयाराम लम्सालले बिरामीको मृत्युपश्चात अस्पतालले समिति गठन गरी अनुसन्धान शुरु गरेको बताए ।
मृतकका परिवारले शल्यक्रियामा संलग्न चिकित्सकको इजाजतपत्र खारेज र परिवारलाई उचित क्षतिपूर्तिको माग गर्दै आएका छन् ।
प्रतिक्रिया