काठमाडौं– नेपाल कम्युनिस्ट पार्टी (नेकपा)का नेता वामदेव गौतमले आगामी मंसिरमा हुने उपनिर्वाचनमा कास्की–२ बाट चुनाव नलड्ने घोषणा गरेका छन् ।

शनिबार बसेको नेकपा सचिवालय बैठकमा उनले कास्की जिल्लाको रिक्त रहेको प्रतिनिधिसभा सदस्यका लागि उम्मेदवारी नदिने जानकारी गराएका हुन् ।

सचिवालय बैठकमा आफूले पोखराबाट चुनाव नलड्ने जानकारी गराएको भन्दै गौतमले सामाजिक सञ्जाल फेसबुकमार्फत आफ्नो धारणा स्पष्ट पारेका छन् ।

यसअघि नेकपाले कास्की क्षेत्र नम्बर २ मा उपनिर्वाचनमा गौतमलाई उम्मेदवार बनाउने चर्चा चलेको थियो । उक्त निर्वाचन क्षेत्रबाट निर्वाचित रविन्द्र अधिकारीको हेलिकोप्टर दुर्घटनामा परी निधन भएको थियो ।

रिक्त रहेको उक्त स्थानमा गौतमलाई उम्मेदवार बनाउने चर्चा भइरहेको अवस्थामा उनले चुनाव नलड्ने घोषणा गर्दै कास्कीकै स्थानीय उम्मेदवार बनाउन आग्रह गरेका छन् ।