काठमाडौं – नायिका केकी अधिकारीले आफूलाई फिल्म ‘बुलबुल’ मन परेको भन्दै स्टाटस लेखेकी छिन् । उनले फिल्म हेरेपछि सामाजिक सञ्जाल फेसबूकमा फिल्मले अलग्गै ढंगले कथा व्यथा प्रस्तुत गरेकाले फिल्मको तारिफ गरिन् ।

‘पात्रहरु यति मन छुने थिए कि, आफूले गर्न पाएको भए पनि हुने खालको लोभ पलाइदिन सफल हुनुभएकोमा कलाकारहरु अनि निर्देशक निर्माताहरुलाई हार्दिक बधाई,’ केकीले फेसबूकमा लेखेकी छिन्, ‘स्वस्तिमाले छक्क नै पारिदिइन् ।’

विनोद पौडेलको लेखन तथा निर्देशन रहेको यो फिल्म यतिबेला नेपालका विभिन्न हलमा चलिरहेको छ । कलात्मक रुपमा बनाइएको यो फिल्मको समीक्षात्मक रुपमा निकै तारिफ आएपनि चटपटे फिल्मका दर्शकले भने खासै रुचाएका छैनन् ।

फिल्ममा स्वस्तिमा खड्का र मुकुन भुसालको शीर्ष भूमिका छ । यस्तै फिल्ममा जोयश पाण्डे, दीपक क्षेत्री, लक्ष्मी बर्देवा लगायतका कलाकारले समेत अभिनय गरेका छन् ।