काठमाडौं– प्रधानसेनापति पूर्णचन्द्र थापाले संगठनको हित हुने काम गर्न कसैले पनि लिखित आदेश पर्खनु नपर्ने बताएका छन् ।

खोटाङको दिक्तेलस्थित बहादुर श्रीशेर गणको निरीक्षणका क्रममा प्रधानसेनापति थापाले राम्रो काम गर्न कसैको आदेश नचाहिने बताएका हुन् । उनले नेपाली सेनालाई सबल, सुदृढ र सक्षम सङ्गठन बनाउन अनुशासनको परिधिमा रही उच्च मनोबलका साथ काम गर्न समेत सकल दर्जालाई निर्देशन दिए ।

उनले सेनालाई सक्षम र प्रभावकारी सङ्गठन बनाउने सन्दर्भमा जारी भएको ७ लक्ष्य र १ सय ५१ कार्यसहितको मार्गनिर्देशन कार्यान्वयन गर्ने विषयमा दायाँबायाँ नहुने बताए । सुरक्षा र विकास एकअर्काका पूरक भएकाले सरकारले अघि सारेको ‘सुखी नेपाली, समृद्ध नेपाल’को अवधारणालाई मूर्तरूप दिन सेनाले सुरक्षाको प्रत्याभूति दिन सक्नुपर्ने उनको भनाइ छ ।