काठमाडौं – युवापुस्तामाझ लोकप्रिय स्टारडम बनाएका अभिनेता अनमोल केसीको यतिबेला अझ बढी चर्चा छ । मिडियामा उनी निरन्तर छाइरहनुको कारण रिलिजको मुखमा रहेको फिल्म ‘क्याप्टेन’ हो ।

यो फिल्ममा उनी राष्ट्रिय हिरोको रुपमा फुटबल खेलाडीको भूमिकामा छन् ।

हरेक फिल्ममा नयाँ नायिकासँग देखिने अनमोलसँग काम गर्ने नायिकाहरुलाई लक्की नायिका पनि भन्ने गरिन्छ । यस्तै ‘क्याप्टेन’ बाट पनि एकसाथ दुई नायिकाले नेपाली रजतपटमा डेब्यु गर्दैछन्, प्रियंका एमभी र उपासना सिंह ठकुरी ।

अनमोललाई के आरोप पनि लाग्ने गर्छ भने उनले नयाँ फिल्मका लागि आफै नयाँ नायिकाहरु सिफारिस गर्ने गर्छन् । अनमोलले भने फिल्ममा कुन नायिका लिने भनेर कहिल्यै आफूले निर्णय नलिने बताए । उनका अनुसार उनले अनमोलले कतिपय नायिकालाई सेटमा आएपछि मात्र चिन्छन् ।

‘क्याप्टेनका नायिकाहरुलाई पनि मैले रिकमेन्ड गरेको होइन, निर्माण टिमले नै खोज्नुभएको हो ।’, अनमोलले खबरहबलाई सुनाए ।

फिल्म ‘क्याप्टेन’ लाई दिवाकर भट्टराईले निर्देशन गरेका हुन् । फिल्ममा अभिनय पनि निर्देशन भट्टराईको नै छ । चलचित्रमा प्रियंका एमभी, उपासना सिंह ठकुरी, सुनील थापा, प्रशान्त ताम्राकार लगायतका कलाकारको मुख्य भूमिका छ ।

स्पार्टस् जानरामा निर्माण भएको यो फिल्म फागुन १७ गतेदेखि रिलिज हुँदैछ ।