काठमाडौं– नेपाल भारत संयुक्त आयोगको पाँचौ बैठकमा भारतले हुलाकी राजमार्ग निर्माणका लागि भारतीय रुपैयाँ ८० करोड बढीको चेक हस्तान्तरण गरेको छ ।

बुधबार काठमाडौंको होटल याक एण्ड यतीमा शुरु भएको बैठकमा भारतले हुलाकी राजमार्ग निर्माणका लागि  ८० करोड ७० लाख ७७ हजार ३ सय ७७ भारतीय रुपैयाँ (१ अर्ब २९ करोड १३ लाख २३ हजार ८०० नेपाली रुपैयाँ) बराबरको चेक हस्तान्तरण गरेको हो ।

बैठकका क्रममा भारतीय राजदूत मञ्जिव सिंह पुरीले सो रकम बराबरको चेक हस्तन्तरण गरेका हुन् ।

विहीबारसम्म चल्ने संयुक्त आयोगको बैठकमा राजनीतिक र सीमा सुरक्षा, सञ्चार सञ्जाल र आर्थिक समृद्धि, व्यापार र पारवहन, ऊर्जा र जलस्रोत लगायतका महत्वपूर्ण विषयमा छलफल हुनेछ ।

आयोग गठन भएको ३२ वर्षपछि पाँचौँ बैठकलाई स्वदेशी विदेशी कूटनीतिक क्षेत्रले विशेष महत्त्वका साथ लिएका छन् । परराष्ट्रमन्त्री प्रदीपकुमार ज्ञवाली र भारतीय विदेशमन्त्री जयशङ्करले संयुक्त अध्यक्षता गर्दै बैठक शुरु भएको हो । यसअघि चौथो बैठक सन् २०१६ मा नयाँदिल्लीमा बसेको थियो ।