काठमाडौं–  भारतीय विदेशमन्त्री एस जयशंकर नेपाल भारतको संयुक्त आयोगको पाँचौ बैठकमा सहभागी हुन आज नेपाल आउँदैछन् । जहाँ उनले नेपाका समकक्षी प्रदीप ज्ञवालीसँग कुराकानी गर्नेछन् ।

जयशंकरको नेपाल भ्रमण अघि बीबीसी हिन्दी रेडियोले नेपालका परराष्ट्र मन्त्री प्रदीप कुमार ज्ञवालीसँग कुराकानी गरेको छ । त्यसक्रममा मन्त्री ज्ञवालीले नाकाबन्दीलाई इतिहासको एउटा यथार्थ भन्दै अब अगाडिको बाटो हेर्नुपर्ने बताए।

‘नेपाल र भारतबीचको सम्बन्ध निकै बहुआयामिक र अन्योन्याश्रित रहेकाले मिलेर अगाडि बढ्नुको विकल्प छैन। विगतबाट दुवै देशले पाठ सिकेका छौँ तर त्यसको छायाँ वर्तमानमा पर्न दिने छैनौँ’ उनले भने ।

त्यस क्रममा नेपाल भारतको सम्बन्धलाई चलायमान बलाउने संयन्त्रमध्येको मन्त्रीस्तरीय सहअध्यक्षता हुने संयुक्त आयोगको बैठक अगाडि बढाइएको छ ।

चीनसँग नजिकिँदा भारतसँगको सम्बन्धमा पर्नसक्ने असरका बारे बीबीसीले सोधेको प्रश्नमा परराष्ट्रमन्त्री ज्ञवालीले भने, ‘भारतसँग हाम्रो विशेष सम्बन्ध छ तर चीन समेत हाम्रो छिमेकी हो। चीनसँगको सहकार्य भारतविरोधी होइन।’

ज्ञवालीले अहिलेको बैठक खासगरी दुई देशका प्रधानमन्त्रीबीच दिल्लीमा भएका समझदारीलाई अगाडि बढाउने आर्थिक मुद्दामा केन्द्रित हुने बताएको बीबीसीले उल्लेख गरेको छ ।