काठमाडौं– प्रमुख प्रतिपक्ष दल नेपाली कांग्रेसका सांसद मीन विश्वकर्माले सभामुख कृष्णबहादुर महराले प्रतिनिधिसभाको नियमावलीलाई आत्मासात गर्न नसकेको आरोप लगाएका छन् ।

कांग्रेस सांसद विश्वकर्माले सभामुख महरालाई सरकारको लाचार छाँयाको रुपमा पनि चित्रण गरे । आइतबार राजधानीमा आयोजित एक साक्षात्कार कार्यक्रममा बोल्दै उनले प्रतिनिधिसभा नियमावलीलाई आत्मासात नगरेकै कारण सभामुख महराले मुलुकमा वर्षाले विपत्ति ल्याउँदा पनि जनप्रतिनिधिमूलक थलो प्रतिनिधिसभा बैठक स्थगित गरेको भन्दै आपत्ति जनाए ।

सांसद विश्वकर्माले सभामुख महराले प्रतिनिधिसभा बैठक खोल्न आफ्नो पार्टीले गरेको आग्रहलाई पनि बेवास्ता गरेको दावी गरे । नियमावली अनुसार संसद सूचारु हुनुपर्नेमा सभामुख महराले आफूखुसी संचालन गरिरहेको पनि सांसद विश्वकर्माको दावी छ ।

कांग्रेस सांसद विश्वकर्माले नियमावली अनुसार नै अघि बढेकाले राष्ट्रिय सभा बैठक भने स्थगित नभएको पनि स्मरण गराए । उनले राष्ट्रिय विपत्तिका बेला पनि प्रतिनिधिसभा बैठक आगामी श्रावण ८ गतेसम्म स्थगित हुनु दूर्भाग्य भएको टिप्पणी पनि गरेका थिए ।