काठमाडौं– नेपाल कम्युनिष्ट पार्टी (नेकपा)को सचिवालय बैठक बस्नुअघि पूर्व पूर्व माओवादी नेताहरुको बैठक बसेको छ ।

दिउँसोका लागि तय भएको सचिवालय बैठकमा जानुअघि पूर्व माओवादीले आफ्नो भागमा परेका विभागको नेतृत्वका बारेमा छलफल गरेको थियो ।

नेकपाको आजको बैठकमा जिल्लाका इन्चार्ज, सहइन्चार्ज, विभिन्न आयोग र मञ्चको पनि टुंगो लगाउने तयारी गरिएपछि पूर्व माओवादीले यसबारेमा छलफल गरेको हो ।

नेकपाका अध्यक्ष पुष्पकमल दाहाल प्रचण्ड निवासमा बसेको पूर्व माओवादी नेताहरुको बैठकले आफ्नाो भागमा परेको विभागको नेतृत्व टुंगो लगाएको छ ।

स्कुल विभागले समस्या

विभाग मध्येको एक स्कुल विभागमा पूर्व एमाले र पूर्व माओवादी दुबैले दाबी गरेपछि समस्या देखिएको छ । स्कुल विभाग पूर्व एमालेले नेता ईश्वर पोखरेललाई दिने तयारी गरेपनि पूर्व माओवादी खेमाले पनि उक्त विभाग नछोड्ने स‌ंकेत गरेको छ ।

नेता नारायणकाजीले विहानको बैठकमा आफूले स्कुल विभाग नछोड्ने बताएसँगै समस्या देखिएको पूर्व माओवादीका एक नेताले बताए ।

“प्रवक्ता नारायणकाजी श्रेष्ठलाई प्रचार विभाग प्रमुखको जिम्मेवारी दिने विषयमा कुराकानी भएको थियो’ ति नेताले भने,’तर उहाँले स्कुल विभाग नछोड्ने कुरा गर्नुभयो ।’

बैठकमा अन्य नेताले पनि जनताको जनवादको विरोधमा रहँदै जनताको बहुदलीय जनवादलाई पार्टीको कार्यदिशा बनाउनुपर्छ भन्दै वकालत गरिरहेका ईश्वर पोखरेललाई स्कुल विभागको जिम्मेवारी दिन नहुने धारणा राखेका थिए ।

नेकपाका ३२ विभागमध्ये १८ वटामा पूर्वएमाले र १४ मा पूर्वमाओवादीले नेतृत्व गर्दैछन् ।