काठमाडौं– आईसीसी टी– २० विश्वकप एसिया फाइनलको लागि नेपाली राष्ट्रिय क्रिकेट टोली अहिले सिंगापुरमा रहेको छ । सोमबारदेखि शुरु हुन लागेको प्रतियोगिताका लागि नेपाली टोली शनिबारै मलेसियाबाट सिंगापुर पुगेको हो ।

मलेसियामा अन्तिम तयारी गरेको नेपाली टोली त्यहीबाट सिंगापुर पुगेको हो । मलेसियामा रहँदा नेपाली टोलीले २ खेलको अन्तर्राष्ट्रिय टि–२० शृङ्खला पनि खेलेको थियो । मलेसियासँग खेलेको शृङ्खला जितेको नेपाली टोली उच्च मनोवलका साथ सिंगापुर पुगेको छ ।

एसिया फाइनलमा नेपालले आयोजक सिंगापुर, मलेसिया, कतार र कुवेतसँग प्रतिस्पर्धा गर्ने छ । फाइनलको शीर्ष टोलीले विश्वकपको ग्लोबल छनोटमा स्थान बनाउने छन् ।

नेपालले पहिलो खेल मंगलबार अर्थात् जुलाई २३ मा कतारसँग खेल्दै प्रतियोगिताको शुरुवात गर्नेछ । यस्तै नेपालले दोस्रो खेलमा मलेसियासंग २४ जुलाई, २७ जुलाईमा कुवेत र २८ जुलाईमा सिंगापुरसंग खेल्नेछन् । प्रतियोगिताको उद्घाटन खेलमा सोमबार आयोजक सिंगापुर र कतारबीच प्रतिस्पर्धा हुँदैछ ।

ग्लोबल छनोट अक्टोबर ११ देखी नोभेम्बर ३ सम्म युएईमा आयोजना हुनेछ । युएई भने आयोजकको रुपमा स्वतः ग्लोबल छनोटमा पुगिसकेको छ ।