काठमाडौं – अभिनेत्री केकी अधिकारी यतिबेला फिल्म ‘छ माया छपक्कै’ को छायांकनमा व्यस्त छिन् । यो फिल्ममा केकी अभिनेता दीपकराज गिरीको अपोजिटमा देखिँदै छिन् । सामाजिक सञ्जालमा पनि उनी उत्तिकै सक्रिय रहन्छिन् । अहिले शूटिङ सेटमा समय मिलिहाल्यो कि, उनी पुस्तक पढ्न थाल्छिन् । केकीले समाजमा के भइरहेको छ र के हुनुपर्ने हो भन्नेमा पनि उत्तिकै चासो राख्छिन् ।

सामाजिक ‘इस्यु’ मा चासो राख्ने केकी यतिबेला साहित्यकार अमर न्यौपानको चर्चित उपन्यास ‘सेतो धरती’ पढिरहेकी छिन् । खबरहबसँगको कुराकानीमा केकीले भनिन्, ‘म त्यस्तो धेरै पढ्ने पाठक त होइन तर समय मिलाएर पढिरहेकी हुन्छु, आजभोलि सेतो धरती पढिरहेकी छु, मन छोएको छ ।’

त्यसो त केकीसँग यतिबेला खासै पढ्ने फुर्सत पनि छैन । किनकि फिल्मको छायांकनले व्यस्त बनाएको छ उनलाई । ‘समय मिलाएर पढिरहेकी छु,’ उनले भनिन् ।

चलचित्र ‘वीर विक्रम २’ को पीजी समीक्षा गरेका कारण पक्राउ परेका प्रनेश गौतमको विषयमा पनि केकीले आफ्नो धारणा राखिन् । सामाजिक सञ्जालमा उनले महिला हिंसा र जीवन दर्शनका विषयलाई महत्त्वका साथ शेयर गरेकी हुन्छिन् ।

‘महिलाहरुमा आक्रमण धेरै अगाडिदेखि हुन थालेको हो, नेपालमा महिला मानसिक रुपमै दबिएका छन्, हुन त शिक्षा कम हुनेबित्तिकै नै समाजमा समस्या आउँछ,’ केकीले थपिन्, ‘महिलाहरु कसैको प्रेसरमा बस्नुपरेपछि मन नै अस्थिर बनिदिन्छ, सामाजिक रुपमा महिलामा नै धेरै आक्रमण किन हुन्छ भन्ने पनि बुझ्न जरुरी छ ।’

केकीले नेपालमा महिलाहरु अझै सुरक्षित बन्न नसकेको धारणा समेत राखिन् ।

पछिल्लो समय केकी फिल्मसँगै म्युजिक भिडियोमा पनि सक्रिय छिन् । अभिनयका कारण फ्यानको तारिफ पाउने केकीले ‘छ माया छपक्कै’ मा कस्तो माया देखाउने हुन्, त्यो भने हेर्न बाँकी छ । फिल्ममार्फत पनि महिला हिंसाको विषय उठाइनुपर्छ भन्नेमा केकीको जोड रहन्छ ।