काठमाडौं– प्रदेश नम्बर १ का आन्तरिक मामिला तथा कानून मन्त्री हिक्मत कार्कीले पाँचथरको मिक्लाजुङ गाउँपालिका–३ मा ९ जनाको ज्यान जानेगरी भएको हत्याकाण्ड सुरक्षा लापरवाहीका कारण नभएको बताएका छन् ।

सुरक्षा व्यवस्था कमजोर भएका कारण उक्त घटना भएको भन्न नमिल्ने मन्त्री कार्कीको भनाइ छ ।

मंगलबार सञ्चारकर्मीसँग कुरा गर्दै मन्त्री कार्कीले उक्त घटनाका सम्बन्धमा प्रदेश सरकारले पनि समीक्षा गर्ने बताए ।

मन्त्री कार्कीले रातिको समयमा परिवारका सदस्यलाई लक्षित गरी भएको घटनालाई लिएर सिंगो सुरक्षा व्यवस्था नै कमजोर भएको भनेर भन्न नमिल्ने बताए ।

‘घटनाले केही आतंक मच्चाए पनि, सुरक्षा थे्रटको अवस्था छैन र सुरक्षा राज्यको नियन्त्रण भित्रै छ,’ मन्त्री कार्कीले भने ।

प्रदेशको ‘गृह मन्त्रालय’ मानिने आन्तरिक तथा कानून मन्त्रालयका प्रमुखले घटनाको सम्बन्धमा दिएको अभिव्यक्ति गैरजिम्मेवारपूर्ण रहेको भन्दै अहिले सामाजिक सञ्जालमा आलोचना भइरहेको छ ।