काठमाडौं- पाँचथरको मिक्लाजुङमा भएको घटनामा एक जनाको मात्र संलग्नता भएको प्रहरीको प्रारम्भिक अनुसन्धानले देखाएको छ । जिल्ला प्रहरी कार्यालय पाँचथरबाट घटनास्थल पुगेका प्रहरी नायब उपरीक्षक नरेन्द्र कुँवरले अहिलेसम्म एक जनाकोमात्र सलग्नता खुलेको बताए ।

हत्याराको बारेमा स्थानीयहरुसँग सोधपुछ गर्ने काम भइरहेको पनि उनले बताए । घटनास्थलबाट भागेको बालिकासँग प्रहरीले लिएको वयानका क्रममा पनि एकजनाले मात्र आक्रमण गरेको पाइएको प्रहरीले बताएको छ । प्रहरीसँगको बयानमा उनले ‘ ढोका खोल्नेबित्तिकै सिधै आक्रमण गर्‍यो, मखुण्डो लगाएको मान्छे थियो, म बाहिर निस्केर भाँगे’ भनेकी छन् ।

कुकुरसहितको टोली घटनास्थलमा

घटनाको अनुसन्धान गर्न एसएसपी नेतृत्वको टोली पुगेको छ । एसएसपीको नेतृत्वमा तालिमप्राप्त कुकुरसहितको टोली घटनास्थलमा पुगेको कुँवरले बताए । घटनाको अनुसन्धानका लागि तालिमप्राप्त कुकुरसहितको प्रहरी टोली परिचालन भएको उनले बताए ।

संघीय प्रहरी कार्यालय, धरानका एसएसपी शरद खत्रीको नेतृत्वमा तालिमप्राप्त कुकुरसहितको टोली खटिएको छ ।

सामुहिक हत्या प्रकरणको अनुसन्धानका लागि नेपाल प्रहरीको केन्द्रीय अनुसन्धान व्यूरो सिआइबीको टोली पनि घटनास्ठल जाँदै गरेको नेपाल प्रहरीका प्रवक्ता विश्वराज पोखरेलले जानकारी दिए ।