काठमाडौं– नेपाल र फ्रान्सबीचको सम्बन्धलाई थप उचाइमा पुर्‍याउने अपेक्षासहित काठमाडौंमा विशेष कार्यक्रमको आयोजना गरिएको छ ।

नेपाल र फ्रान्सबीच द्विपक्षीय कुटनीतिक सम्बन्ध स्थापना भएको ७० औं वर्षगाँठका अवसरमा सैनिक अफिसर्स क्लब भद्रकालीमा विशेष कार्यक्रमको आयोजना गरिएको हो ।

कार्यक्रममा परराष्ट्रमन्त्री प्रदीप ज्ञवालीले दुबै मुलुक समुन्नत सभ्यता, सँस्कृति र परम्पराको केन्द्रका रुपमा रहेको बताए । उनले भने, ‘दुबै मुलुक हिमाली भू–वनोट र सँस्कृतिका कारण पनि विश्वभर परिचित छन् ।’

परराष्ट्रमन्त्री ज्ञवालीले स्वतन्त्रता, समानता, शान्ति र सहअस्तित्वको मान्यता राख्दै दुबै मुलुकले राजनीतिक, आर्थिक विकासलाई टेवा दिँदै आएको बताए । उनले नेपाल र फ्रान्स भौगालिक रुपमा निकै टाढा रहे पनि दुई मुलुकको साझा चासो र समानता अन्य मुलुकको भन्दा पृथक रहेको तर्क गरे ।

कार्यक्रममा नेपालका लागि फ्रान्सेली राजदूत फ्रास्वाँ–जेभियर लेजरले नेपाल फ्रान्सेली पर्यटकका लागि आकर्षक गन्तव्यका रुपमा रहेको बताए । उनले भने ‘हरेक वर्ष ३२ हजार भन्दा धेरै फ्रान्सेली पर्यटकले नेपाल भ्रमण गर्ने गरेका छन् ।’

नेपाल र फ्रान्सबीच सन् १९८० को दशकबाट शुरु भएको हिमाली क्षेत्रको सहकार्यको स्मरण गर्दै राजदूत लेजरले नेपालमा सहयोगको परिचालन गर्ने क्षेत्रबारे पनि फ्रान्सले अध्ययन गरिरहेको जनाए ।

दुई मुलुकबीच जनस्तरको सम्पर्कलाई जोड दिनुपर्ने जनाउँदै राजदूत लेजरले सन् २०१९ मा फ्रान्स र नेपालबीच उच्चस्तरीय राजनीतिक भ्रमणको आदान–प्रदान हुने समेत जनाए ।

नेपाल र फ्रान्सबीच द्विपक्षीय सम्बन्ध स्थापना भएको अवसरमा आयोजना हुने सबै समारोहको खबरहब डिजिटल मिडिया साझेदार हो । कार्यक्रमलाई विशेष बनाउन सांगीतिक कार्यक्रमको समेत आयोजना गरिएको थियो ।