काठमाडौं– भारतमा जारी आईपीएल क्रिकेट अन्तर्गत शनिबार राति भएको दोस्रो खेलमा जित हात पार्दै दिल्ली क्यापिटल्स अंक तालिकाको तेस्रो स्थानमा उक्लिएको छ ।

शनिबार भएको खेलमा दिल्लीले किङ्स इलाभेन पञ्जावलाई पाँच विकेटले हराउँदै अंक तालिकाको तेस्रो स्थानमा उक्लिन सफल भएको हो । दिल्लीले १० खेलबाट १२ अंक जोडेको छ ।

१ सय ६४ रनकाे विजयी लक्ष्य सहित मैदानमा उत्रिएको दिल्लीले २ बल बाँकी रहँदा ५ विकेटको क्षतिमा भेटायो ।

दिल्लीको जितका लागि शिखर धवनले ५६ रन बनाए भने श्रेयस अएरले ५८ रन बनाए । पृथ्वी साहले १३ रन बनाएका थिए । त्यस्तै रिशभ पन्तले ६ रनको योगदान दिए ।

यसअघि पहिले ब्याटिङ गरेको किङ्स इलाभेन पञ्जावले ७ विकेटको क्षतिमा १ सय ६३ रन बनाएको थियो ।

खेलमा नेपाली लेग स्पेनर सन्दीप लामिछानेले शानदार प्रदर्शन गरे । सन्दीपले ४० रन खर्चिएर ३ विकेट लिए । सन्दीपले लोकेश राहु, साम करण, क्रिस गेललाई आउट गर्दै ३ विकेट लिए । यो सँगै पाँच खेल खेलेका सन्दीपल ८ विकेट लिएका छन्।

प्रतियोगितामा ९ खेलबाट १४ अंकसहित चेन्नाइ सुपर किङ्स शीर्ष स्थानमा रहेको छ  भने १० खेलबाट समान १२ अंक जोडेको मुम्बई इन्डियन्स दोस्रो स्थानमा छ ।