काठमाडौं– नेपाली काँग्रेसका महामन्त्री डा. शशांक कोइरालाले संघीयता र गणतन्त्रको विरोधमा आफूले कुनै पनि अभिव्यक्ति नदिएको दावी गरेका छन् । उनले संघीयता र गणतन्त्र राजनीतिक उपलब्धि भएको उल्लेख गर्दै त्यसको संस्थागत विकास गर्नुपर्ने कुरामा आफ्नो सधै जोड रहेको स्पष्ट पारेका छन् ।

बुधबार काठमाडौंको टोखास्थित आफ्नै निवासमा संचारकर्मीमाझ जनताले चाहे गणतन्त्र र संघीयताका विषयमा जनमत संग्रहमा जान काँग्रेस तयार रहेको अभिव्यक्ति दिएर विवादमा आएसँगै महामन्त्री कोइरालाले हिन्दु राज्य स्थापनाका लागि भने सरकारलाई दवाव दिन जनतालाई पुनः अपिल गरे ।

फरक प्रसंगमा महामन्त्री कोइरालाले नेतविक्रम चन्द नेतृत्वको नेपाल कम्युनिष्ट पार्टीसँग तत्काल संवाद गर्न पनि सरकारलाई अपिल गरे । चन्द नेतृत्वको नेकपालाई वार्ताको टेवुलमा ल्याएर समस्या समाधान गर्नुको साटो धरपक्कड गरेर सरकारले गल्ती गरिरहेको महामन्त्री कोइरालाको तर्क थियो ।