लन्डन– बेलायती प्रधानमन्त्री टरिजा मेले बेलायत युरोपेली युनियन इयुबाट बाहिरिने म्याद ३ महिना थप्ने प्रस्ताव गरेकी छिन् । बेलायत युरोपेली युनियनबाट बाहिरिने म्याद आगामी मार्च २९ मा सकिँदैछ । यद्यपि प्रधानमन्त्री मेले इयुसँग गरेको सम्झौताको प्रस्ताव बेलायती संसद्बाट २ पटक असफल भएपछि उनले इयुबाट बाहिरिने प्रक्रिया ३ महिनासम्म अर्थात् आगामी जुन ३० सम्म पु¥याउन प्रस्ताव गरेकी हुन् ।

यसका लागि उनी इयु मुख्यालय ब्रसेल्स जाने कार्यक्रम छ । त्यहाँ उनले इयुका प्रतिधिसमक्ष इयुबाट बाहिरिने प्रक्रियाका लागि आवश्यक समय ३ महिनाका लागि थप्ने विषयमा छलफल गर्नेछिन् ।

उनले बेलायत इयुबाट बाहिरिने म्याद ३ महिना थप्न गरेको प्रस्ताव इयुमा आबद्ध अरु सबै २७ मुलुकले सदर गर्नुपर्ने प्रावधान छ । त्यसबाहेक बेलायतको विपक्षी दल लेबर पार्टीका नेता जेरेमी कोर्बेन पनि ब्रसेल्समा इयुका नेताहरुसँग छुट्टै छलफल गर्न त्यसतर्फ लागेका छन् ।

वर्तमान अवस्थामा कुनै परिवर्तन नआएमा बेलायत अर्को साताको शुक्रबार इयुबाट बिना कुनै सम्झौता बाहिरिँदै छ । बेलायत इयुबाट बिना सम्झौता बाहिरिएमा त्यसले बेलायतका अर्थतन्त्रमा नकारात्मक असर पार्ने चिन्ता उत्पन्न हुँदै आएको छ ।

प्रधानमन्त्री मेले इयुबाट बाहिरिने विषयमा गरेको सम्झौता बेलायती संसद्बाट दुई पटक असफल भइसकेको छ । अर्कोतर्फ बेलायती संसद्का सभामुख जोन बर्कोले इयुसँग प्रधानमन्त्री मेले गरेको एउटै किसिमको सम्झौता तेश्रो पटक पनि पारित गर्न ल्याएमा त्यसलाई संसदीय प्रक्रियामा ल्याउन नदिइने घोषणा गरिसकेका छन् ।

तर, बेलायती संसद्ले कुनै पनि हालतमा बिना सम्झौता बेलायत इयुबाट बाहिरिन नसक्ने गैर बाध्यकारी अर्को प्रस्ताव पनि पारित गरेको छ । यस्तोमा निकै कम समय रहेको अवस्थामा मेलाई बेलायत इयुबाट बाहिरिने प्रक्रिया ३ महिना थप्न चर्को दबाब परिरहेको बताइएको थियो ।

मेले प्रधानमन्त्री कार्यालय १० डाउनिङ स्ट्रिटबाट राष्ट्रका नाममा सम्बोधन गर्दै आफ्नो प्रस्ताव दुई पटक सम्म असफल हुनुमा बेलायती सांसद्हरु जिम्मेवार रहेको भन्दै असन्तुष्टि समेत जनाएकी छिन् । उनले केही मानिसहरुले बेलायत इयुबाट बाहिरिने प्रक्रियाको म्याद अझै लामो समयसम्म थप्न प्रयास गरेको भएपनि त्यसले बेलायतलाई अझ विखण्डित गर्ने भएकाले त्यो संभव नरहेको जनाएकी छिन् ।

यता युरोपेली परिषद्का अध्यक्ष डोनाल्ड टस्कले भने बेलायत र इयुबीच भएको सम्झौता बेलायती संसद्बाट पारित हुने अवस्था रहेमा बेलायतले थप्न चाहेको ३ महिनाको म्याद इयुले पारित गर्नेमा आफू विश्वस्त रहेको प्रतिक्रिया दिएका छन् । तर, इयुका नेताहरु कति लामो समयसम्म बेलायत इयुबाट बाहिरिने प्रक्रियाको म्याद थप्न तयार छन् भन्ने प्रश्न जीवितै रहेको समेत जनाएका छन् ।