जनकपुर– काठमाडौं उपत्यका लगायत पहाडी जिल्लामा बुधबार मनाइएको होली पर्व तराईका जिल्लामा आज धुमधामसाथ मनाइँदै छ भने जनकपुरमा भोलि मात्र मनाइनेछ ।

प्राचीन मिथिलाको राजधानी जनकपुरमा १५ दिने मिथिला माध्यमिकी परिक्रमाका श्रद्धालुहरू जनकपुरको अन्तरगृह प्रवेश गरेको भोलिपल्ट जनकपुरधामममा होली मनाउने चलन छ ।

माध्यमिकी परिक्रमा बुधबार जनकपुरस्थित बाह्रबिघामा समापन भएको हो भने विहीबार विहानै जनकपुरको अन्तरगृह परिक्रमा सकिएपछि शुक्रबार जनकपुरधाममा होली मनाइने जानकी मन्दिरका सहमहन्थ रामरोशन दास वैष्णबले बताए ।

नेपाल र भारतको १ सय ३३ किलोमिटर पैदल यात्रा गरेर माध्यमिकी परिक्रमामा सहभागी साधुसन्त तथा श्रद्धालु जनकपुर पुगको छन् ।

यसैबीच प्रदेश नम्बर २ मा प्रदेश सरकारले आज र भोलि सार्वजनिक बिदा दिने घोषणा गरेको छ । प्रेस विज्ञप्ति जारी गर्दै मुख्यमन्त्री लालबाबु राउतले होली पर्वलाई शान्तिपूर्ण तरिकाले हर्षोल्लासपूर्वक मनाउन प्रदेशवासीमा आह्वान गरेका छन् ।

होली पर्वले समाजमा विद्यमान आपसी भाइचारा र सद्भावलाई थप बलियो बनाउने विश्वास लिएको मुख्यमन्त्री राउतद्वारा जारी विज्ञप्तिमा उल्लेख छ ।