काठमाडौं- स्पेनिस ला लिगा फुटबलमा एट्लेटिको मड्रिड बराबरीमा रोकिएको छ । शनिबार भएको खेलमा एट्लेटिको भ्यालेन्सियासँग १-१ गोलको बराबरीमा रोकिएको हो ।

घरेलु मैदानमा सुरुवाती अग्रता जोगाउन नसक्दा एट्लेटिकोले १० खेलाडीमा सिमित भ्यालेन्सियासँग बराबरी खेलेको हो ।

खेलको ३६ औं मिनेटमा डिएगो कोष्टाले पेनाल्टीमा गोल गर्दै एट्लेटिकोलाई अग्रता दिलाएका थिए । तर, खेलको ८२ औं मिनेटमा डानी परेजोले गोल गर्दै भ्यालेन्सियालाई हारबाट जोगाए ।

यस्तै खेलको इन्जुरी समयमा ली कान्गिनले रातो कार्ड पाएपछि भ्यालेन्सिया अन्तिम केहि समय १० खेलाडीमा समेटिएको थियो ।

यो बराबरीसँगै चौंथो स्थानको एट्लेटिकोले ९ खेलबाट १६ अंक जोडेको छ । छैटौं स्थानको भ्यालेन्सियाले १३ अंक जोडेको छ ।