काठमाडौं– राष्ट्रिय सभाको शून्य समयमा अख्तियार दुरुपयोग अनुसन्धान आयोगका पुर्व आयुक्त राजनारायण पाठकले गरेको भ्रष्टाचारको मुद्दा अदालत सम्म ल्याउन माग गरिएको छ ।

बुधबार बसेको राष्ट्रिय सभाको बैठकमा नेकपाका सांसद राम नारायण विडारीले विद्यमान धेरै कानुनले अनुसन्धान गरी कानूनी कारबाही अगाडि बढाउन सकिने अवस्था रहेकोले अनुसन्धान प्रक्रिया अघि बढाउन माग गरे ।

राष्ट्रिय सभाको शून्य समयमा बोल्दै नेपाली कांग्रेसका सांसद राधेश्याम अधिकारीले नेपालको पानी जनताको लगानी कार्यक्रममा तमोर र बुढीगण्डकी जस्ता आयोजना किन नसमेटिएको भन्दै प्रश्न गरेका थिए ।सांसद अधिकारीले एक दैनिक पत्रिकामा आएको समाचार पढ्दै दुवै आयोजना बिदेशी कम्पनीलाई बेचिएको होकी भनेर आशंका रहेको बताए ।

सांसद बृशेष चंद्रलालले मेलम्ची खानेपानी आयोजनामा भएको अनियमितता सतहमा आएको भन्दै दोषीलाई कारबाहीको माग गरे । मन्त्री र सचिवको जुहारीले अनियमितता भएको प्रष्ट भएकोले आफूलाई भ्रष्टाचारविरुद्ध उभ्याएको सरकारले कसरी कारबाही गर्छ भनेर प्रश्न गरे ।

राष्ट्रियसभाको शून्य समयमा सांसद रामप्रित पाशवानले धनुषा जिल्लामा पछिल्लो समय महिला माथिको हिंशाको घटना बढेको भन्दै सरकारको ध्यानाकर्षण गरे ।  यस्तै सांसद सरिता प्रसाइले निर्माण थालिएको काष्ठमण्डपको तीन वटा थाम नयाँ र एउटा पुरानो मिसाएर गाडिएकोले संरचना कमजोर हुन सक्ने भन्दै पर्यटन मन्त्रीको ध्यानाकर्षण गराइन् ।