ललितपुर– काठमाडौँ उपत्यकाको पुरानो जात्रामध्येको एक नरसिंह जात्रा पाटनमा मनाइएको छ । ललितपुरका मल्ल राजा सिद्धिनरसिंहको पालादेखि शुरु भएको मानिएको यो जात्रा हरेक वर्ष भाद्र कृष्ण पञ्चमीका दिन मनाउने परम्परा छ ।

मंगलबार मंगलबजारको तुइलाक्वः टोलबाट नरसिंहसहित देवदेवीको यात्रा शुरु भएको छ । जात्रा शुरु हुनु अगाडि पाटन दरबार क्षेत्रमा रहेको भीमसेन मन्दिरमा सबैको कल्याणको कामना गर्दै नरसिहंको विशेष पूजा गर्ने चलन छ । जात्रामा भगवान नृसिंहसँगै लक्ष्मी र सरस्वतीलाई देवीको रुपमा राखिन्छ ।

बिष्णु भक्त प्रह्लादले जात्रा अवधिभर नै भगवान नरसिंहको सेवा गरिरहेको देख्न पाइन्छ । जात्रामा अप्सराहरूले नरसिंह भगवान हिँड्ने बाटो कुचोले बढार्ने, गोरसले बाटो पखाल्ने, लावाले मार्गलाई सम्मान गर्ने, चवरपंखले हम्कने र दण्डद्वारा बाटोको सुरक्षा गरेका दृश्य जात्राका मुख्य आकर्षण हुन् ।

यो जात्रा पाटनका राजोपाध्याय ब्राम्हण समुदायबाट सञ्चालन गर्ने चलन छ । यो जात्रा करिब ३ सय ८७ वर्ष पुरानो भएको लिखित इतिहास रहेको भनाइ छ ।

नरसिंह जात्राको क्रममा बाजागाजा, प्रत्यक्ष भजनसहित नरसिंहको देवगणको टोलीले पाटनको गाबहाल, पिम्बहाल, बंगलामुखी, कोबहाल, मंगलबजार, सुन्धारालगायत विभिन्न ठाउँमा यात्रा गराउने चलन छ ।

यो जात्रा बिष्णु भक्त प्रह्लादलाई उद्दार गर्न भगवान विष्णुले नरसिंह अवतार लिई दानव हिरण्डकश्यपुको वध गरेको सम्झनामा मनाइएको मानिन्छ ।