बाँके– सामाजिक सञ्जालमा एक जनप्रतिनिधिको तस्वीर अहिले भाइरल बनेको छ । उनको तस्वीरका विषयमा विभिन्न आलोचनात्मक टिका टिप्पणी भइरहेका छन् ।

उनको आलोचना हुनुको पछाडि एउटै कारण हो, उनी औपचारिक कार्यक्रममा हाफ पाइन्टमै उपस्थित भए । उनी हुन्–नेपालगंज उपमहानगरपालिकाका मेयर डा. धवल शमशेर राणा ।

स्थानीय तहको निर्वाचनमा नेपाली कांग्रेसका सुरेश कुमार कनोडियालाई पराजित गर्दै निर्वाचित भएका थिए । राणा राप्रपाका महामन्त्री पनि हुन् । त्यसो त बाँकेमा उनले विकासवादी नेताको परिचय समेत बनाएका छन् ।

केही दिन अघि भएको नेपाल उद्यमी संघ बाँकेको १६औं साधारणसभाको उद्घाटन गर्न अतिथि भएर पुगेका थिए– हाफ पाइन्टमा । १८ साउनमा नेपाल घरेलु तथा साना उद्योग महासंघ बाँकेको नगरस्तरीय समिति गठनमा पनि उनले हाफ पाइन्ट लगाएरै आथित्यता ग्रहण गरे ।

जतिसुकै राम्रो काम गरे पनि औपचारिक कार्यक्रममा उपस्थित हुँदा औपचारिक पोसाक लगाउनुपर्छ भन्ने कुरा जनप्रतिनिधिलाई आयोजकले सिकाइरहनुपर्ने विषय भने होइन । उनी भने हाफ पाइन्टमै कार्यक्रममा उपस्थित भए ।

पछाडि व्यानरमा टागिएको छ– महिला उद्यमी संघ नेपाल । अगाडि सोफामा अन्य अतिथिको बीचमा आफ पाइन्टमै मेयर राणा बिराजमान छन् ।

तस्वीर हेर्दा उनी केही असहज महशुस गरिरहेको देखिन्छन् । एउटा कार्यक्रममा मात्र नभएर दुई दुई वटा कार्यक्रममा उनी उही ड्रेसअपमै कार्यक्रममा उपस्थित भएको पाइएको छ ।