काठमाडौं- आईसीसी एकदिवसीय विश्वकप क्रिकेटको जारी खेलमा अस्ट्रेलियाले बंगलादेशलाई ३८२ रनको विशाल लक्ष्य दिएको छ ।

४९ औं ओभरको खेल जारी रहँदा वर्षाले केहीबेर प्रभावित भएको खेलमा अस्ट्रेलियाका लागि ओपनिङ ब्याट्सम्यान डेभिड वार्नरले आक्रामक ब्याटिङ गर्दा अस्ट्रेलियाले बंगलादेशविरुद्ध निर्धारित ओभरमा ५ विकेट गुमाएर ३८१ रनको योगफल बनायो ।

ट्रेन्ट ब्रिजमा जारी खेलमा अस्ट्रेलियाका लागि वार्नरसहित ३ ब्याट्सम्यानले अर्धशतक बनाए । वार्नरले १४ चौका र ५ छक्काको मद्दतमा १६६ रन बनाए । यस्तै, उस्मान ख्वाजाले ७२ बलमा १० चौकाको मद्दतमा ८९ रन बनाउँदा कप्तान आरोन फिन्चले ५३ रन बनाए ।

चौथो विकेटका रुपमा मैदान छिरेका अलराउण्डर ग्लेन म्याक्सवेलले आक्रामक ब्याटिङ गर्दै १० बलमा ३२ रनको योगफल बनाए । अस्ट्रेलियाविरुद्ध बंगलादेशका बलरहरुलाई पहिलो तीन विकेट लिन निकै संघर्ष गर्नु पर्‍यो । बंगलादेशका लागि सोम्य सरकारले ३ विकेट लिए भने मुस्ताफिजुर रहमानले १ विकेट लिए ।