अमेरिका– अमेरिकी राष्ट्रपति डोनाल्ड ट्रम्पले इरानले अमेरिकाविरुद्ध युद्ध चाहिरहेको भन्दै अमेरिकाविरुद्धको युद्धले इरानको अन्त्य हुने चेतावनी दिएका छन् ।

राष्ट्रपति ट्रम्पले ट्विट गर्दै इरानले अमेरिकाविरुद्ध युद्ध नै चाहेको भए इरानको ‘औपचारिक रुपमै’ अन्त्य हुने चेतावनी दिएका हुन् । उनले ट्विटमा अमेरिकालाई नधम्क्याउन समेत इरानलाई चेतावनी दिएका छन् । अन्तर्राष्ट्रिय सञ्चारमाध्यमका अनुसार अमेरिकाले इरानलाई दिएको यो हालसम्मकै सबैभन्दा कडा चेतावनी हो । यसअघि राष्ट्रपति ट्रम्पले इरानसँग युद्ध नचाहेको जनाएका थिए । पछिल्लो समय इरान र अमेरिकाबीचको सम्बन्ध निकै खराब चलिरहेका बेला राष्ट्रपति ट्रम्पको यस्तो चेतावनी आएको हो ।

यसैबीच इराकको राजधानी बगदादमा रहेको अमेरिकी दूतावासनजिक रकेट आक्रमण भएको छ । बगदादको ग्रिन जोनमा रेकट आक्रमण भएको जनाइएको छ । आक्रमणमा कुनै मानवीय तथा भौतिक क्षति नपुगेको अधिकारीले जनाएका छन् । यता अमेरिकी अधिकारीले भने ‘अमेरिकालाई लक्षित गरी गराइएको’ उक्त आक्रमणमा इरान समर्थित लडाकुको हात रहेको हुनसक्ने भन्दै अनुसन्धान थालिएको जनाएका छन् ।

केही दिनअघिमात्र अमेरिकाले इरान समर्थित लडाकुबाट आक्रमण हुनसक्ने भन्दै इराकमा रहेको अमेरिकी राजदूतावास तथा इराकको स्वशासित क्षेत्र इराकी कुर्दिस्तानको राजधानी इर्बिलमा रहेको नियोगबाट आफ्ना कर्मचारी फिर्ता गरेको थियो ।