काठमाडौं– सत्तारुढ नेकपा कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले अमेरिकाको मिलिनियम च्यालेन्ज कर्पोरेशन (एमसीसी) सम्झौता इन्डो प्यासिफिक रणनीति अन्तर्गत भए अस्वीकार्य हुने बताएका छन् ।

एमसीसीका विषयमा स्थायी कमिटीमा समेत छलफल भइरहेको बताउँदै अध्यक्ष प्रचण्डले एमसीसी इण्डो प्यासिफिक रणनीति अन्तर्गत भए अस्वीकार्य हुने बताएका हुन् ।

उनले नेकपा संसदीय दलको बैठकलाई सम्बोधन गर्दै बाहिर हल्ला गरे जस्तो भएपनि इण्डो प्यासिफिक ओरियन्टेड हो भन्ने भयो भने स्वीकार नहुने बताएका हुन् । उनले भने, ‘शान्ति र विकासका लागि हो भने अगाडि बढाउन सकिन्छ ।’

यसबारे पार्टीले निर्णय गरेपछि संसदीय दलमार्फत जानकारी गराइने जानकारी दिए । बिहीबारदेखि जारी नेकपा स्थायी कमिटी बैठकमा नेताहरुले एमसीसीबारे प्रश्न उठाएका थिए ।

बैठकमा परराष्ट्रमन्त्री प्रदीप ज्ञवालीले भने एमसीसी, इण्डो प्यासिफिकको अंग नभएको बताएका थिए ।