म्याग्दी- म्याग्दीका एक युवा व्यवसायीले बाटोमा भेट्टाएको नगद र चेकसहितको महत्वपूर्ण सामग्री सम्बन्धित व्यक्तिलाई हस्तान्तरण गरेका छन् ।

ती इमान्दार युवा हुन झलक शर्मा । रघुगङ्गा गाउँपालिका–२ पञ्चासेका शर्माले अन्नपूर्ण गाउँपालिका–३ दानाकी रिया थापाको पैसासहितको झोला खोजी गरेर फिर्ता गरेका हुन् ।

थापाको झोला बेनीदेखि दानातर्फ जाने क्रममा जीपको झ्यालबाट खसेरको थियो ।

बेनी–गलेश्वर सडकखण्डअन्तर्गत जलेश्वरको बीच सडकमा भेटिएको सो झोलामा रहेको ५० हजार २२५ नगद, ५९ हजार बराबरको बैंकको चेक, दुई थान नेपाली नागरिकताको प्रमाणपत्र, औषधि, मोबाइललगायतका सामग्रीलाई गलेश्वर प्रहरीचौकीमा जनप्रतिनिधिको रोहवरमा शर्माले सम्बन्धित व्यक्तिलाई उपलब्ध गराएका हुन् ।

बेनीमा मेघावान कन्ट्रक्सन व्यवसाय सञ्चालन गर्दै आएका शर्माले मोटरसाइकलमार्फत यात्रा गर्दा सडकमा झोला भेट्टाएका थिए । भेटिएको झोलामा नगद, चेक, मोबाइल र नागरिकतालगायतका महत्वपूर्ण कागजात देखेपछि सम्बन्धित व्यक्तिको खोजीमा लागेका उनले चेकको पछाडि लेखिएको मोबाइल नम्बरमार्फत सम्बन्धित मान्छे पत्ता लगाएका हुन् ।

आफ्नो हराएको सामग्री फेला पारी उपलब्ध गराएकोमा थापाले शर्मालाई धन्यवाद दिइन ।