काठमाडौं- तारकेश्वर नगरपालिकाको न्यायिक समितिमा जग्गा विवादको उजुरी बढी दर्ता भएको छ ।

आर्थिक वर्ष २०७५/७६ मा नगरपालिकाको न्यायिक समितिमा ८१ वटा उजुरी दर्ता भएकामा २८ उजुरी जग्गा विवादको रहेको न्यायिक समितिका संयोजक तथा उपप्रमुख भवानी डोटेलले बताए ।

अधिकांश साँध सिमाना, एक जनाको हकको जग्गा अरूबाट भोगचलन गरेको, एउटाको जग्गा अर्काले मिचेको जस्ता उजुरी नगरपालिकाको न्यायिक समितिमा पर्ने गरेको उपप्रमुख डोटेलले जानकारी दिए । उनका अनुसार आव २०७५/७६ मा नगरपालिकाको न्यायिक समितिमा नौवटा सार्वजनिक जग्गा तथा बाटोसम्बन्धी, दुई सम्बन्धविच्छेदसम्बन्धी, एक महिला तथा बालबालिका हिंसासम्बन्धी, २८ जग्गा विवादसम्बन्धी, २२ विविध विषयसम्बन्धी र १९ सिमाना विवादको उजुरी दर्ता भएको कार्यालयले जनाएको छ ।

यस अवधिमा ३१ वटा मुद्दा किनारा लगाइएको छ । सहमति भएका मुद्दाको सङ्ख्या २०, प्रक्रियामै रहेको ४९ र न्यायिक समितिबाट मुल्तबीमा राखिएको मुद्दाको सङ्ख्या एक रहेको छ ।

व्यक्तिगत तथा घरेलु हिंसाका उजुरी नगरपालिकाको न्यायिक समितिमा नपरे पनि जग्गा विवाद, सम्बन्धविच्छेद, सार्वजनिक जग्गा विवाद, महिला बालबालका हिंसासम्बन्धी उजुरी नगरपालिकाको न्यायिक समितिमा पर्ने गरेको बताइएको छ । नगरपालिकाका न्यायिक समितिमा आउने उजुरीहरु सबै लिखित रुपमै आउने गरेका छन् ।