काठमाडौं – इङ्ग्लिस क्लब टोटनह्यामका मुख्य प्रशिक्षकमा जोजे माउरिन्हो नियुक्त भएका छन् ।

मंगलबार अप्रत्यासित रुपमा मुख्य प्रशिक्षक माउरिसियो पोचेटिन्होलाई बर्खास्त गरेपछि क्लबले माउरिन्होलाई प्रशिक्षक नियुक्त गरेको हो ।

पूर्व चेल्सी र म्यानचेस्टर यूनाइटेडका मुख्य प्रशिक्षक माउरिन्होले सन् २०२२–०२३ को सिजनको अन्त्यसम्मका लागि टोटनह्यामसँग सम्झौता गरेका छन् ।

नयाँ प्रशिक्षक नियुक्त गरेसँगै टोटनह्यामका अध्यक्ष ड्यानियल लेभिले माउरिन्हो फुटबलमा एक सफल प्रशिक्षक रहेको बताएका छन् ।

पोचेटिन्हो सन् २०१४ मे मा क्लबको प्रशिक्षकको जिम्मेवारीमा आएका थिए । तर, उनले आफ्नो कार्यकालमा कुनै पनि उपाधि क्लबलाई जिताउन सकेनन् ।

अध्यक्ष लेभिले माउरिन्होसँग अथाह अनुभव रहेको र त्यहि अनुभवका आधारमा नयाँ ‘टेक्टिस’ लगाएर टिमलाई अगाडि बढाउने विश्वास व्यक्त गरेका छन् ।