काठमाडौं- सिंहदरबारभित्रका विभिन्न मन्त्रालय र निकायका २२६ कर्मचारीले अनुशासन पालना नगरेको पाइएको छ ।

शुक्रबार राष्ट्रिय सर्तकता केन्द्रले तीन मन्त्रालयसहित अन्य तीन निकायमा गरेको अनुगमनका क्रममा २२६ कर्मचारीले समयको पालना नगरेको, तोकिएको पोसाक नलगाएको, बिदा स्वीकृत नगरी बिदामा बसेको तथा अनुपस्थित रेहेको पाइएको केन्द्रका सहप्रवक्ता डालनाथ अर्यालले जानकारी दिए ।

केन्द्रले अर्थ मन्त्रालय, खानेपानी मन्त्रालय, उद्योग वाणिज्य तथा आपूर्ति मन्त्रालय, मुद्रण विभाग, रेडियो नेपाल र राष्ट्रिय पुनर्निर्माण प्राधिकरणमा आकस्मिक छड्के अनुगमन गरेको थियो ।

यसक्रममा समयको पालना नगर्नेमा १६९, बिदा स्वीकृत नगराउनेमा ३२, पोसाक नलगाउनेमा १४ र सिट छड्केमा ११ जना परेको केन्द्रले जनाएको छ । केन्द्रका अनुसार नियम पालना नगर्नेमा सबैभन्दा बढी मुद्रण विभागका ६१ जना कर्मचारी छन् ।