नयाँ दिल्ली– केही दिनयतादेखि सक्रिय मनसुनका कारण भारतभर मुसलधारे वर्षा जारी छ । भारतका आधाभन्दा धेरै भूभाग वर्षासँगैको बाढी र पहिरोका कारण प्रभावित भएका छन् ।

भारतका उत्तरी राज्यहरु उत्तराखण्ड, हिमाचल प्रदेश, राजस्थान, हरियाण, पञ्जाव, जम्मू कश्मीरमा बाढी र पहिरोका कारण जनजीवन अस्तव्यस्त बनेको छ ।

उत्तरी भारतका ठाउँठाउँमा वर्षासँगै पहिरोका गएका कारण सञ्चार, यतातायत तथा विद्युत सेवा अवरुद्ध भएको छ । भारतीय सञ्चारमाध्यमले बाढीले सवारी साधन बगाएको तथा र पहिरोका कारण सडक अवरुद्ध भएको दृश्य सार्वजनिक गरेका छन् ।

बाढी र पहिरोका कारण दशौं लाख मानिसहरु प्रभावित भएको अधिकारीले जनाएका छन् । भारतीय सञ्चारमाध्यमले उत्तरी भारतमा दर्जनौं मानिसहरुको ज्यान गएको बताएका छन् । वर्षा नरोकिँदा प्रभावितको उद्धारका लागि गएका उद्धारकर्ताहरु पनि बाटोमै रोकिएका छन् ।

वर्षाका कारण सयौं उडान अवरुद्ध भएका छन् भने रेलसेवा पनि नराम्ररी प्रभावित भएका छन् । रेल तथा हवाई सेवा अवरुद्ध हुँदा दशौं हजार यात्रीहरुले सास्ती खेप्नु परेको छ ।

अस्पतालहरुमा बाढीबाट घाइते भएका मानिसहरुको भीड लागेको बताइएको छ । भारतीय मौसम पूर्वानुमान विभागले सोमबार दिनभर वर्षा हुने भविष्यवाणी गरेको छ । त्यसबाहेक विभिन्न क्षेत्रमा बाढी र भूस्खलनले किसानको खेतीपाती नष्ट पारेको छ ।

उत्तर प्रदेशको बनारसमा गंगा नदीको सतह खतराको स्तरभन्दामाथि पुगेकाले त्यहाँको घाटसमेत डुबाएको भारतीय सञ्चारमाध्यमले जनाएका छन् ।