खार्तुम– सुडानका अपदस्थ राष्ट्रपति ओमर अल बशिरले साउदी युवराज मोहम्मद बिन सलमानसँग करोडौं अमेरिकी डलर लिएको स्वीकार गरेका छन् ।

भ्रष्टाचारबारेको अनुसन्धानका क्रममा उनले बिन सलमानसँग ९ करोड अमेरिकी डलर लिएको स्वीकार गरेका हुन् । उनलाई सोमबार राजधानी खार्तुमस्थित अदालतमा भ्रष्टाचार बारेको सुनुवाईका लागि अदालतमा उपस्थित गराइएको थियो ।

उनीविरुद्ध विदेशीहरुसँग अवैध रकम लिएका, भ्रष्टाचार गरेकोलगायतका विषयमा सुनुवाई भएको बताइएको छ । त्यसबाहेक उनीविरुद्ध प्रदर्शनकारीको गैरन्यायिक हत्या गरेको अभियोग समेत लाग्दै आएको छ ।

व्यापक प्रदर्शनपछि उनलाई गत अप्रिल महिनामा सैन्य कूमार्फत अपदस्थ गरिएको थियो । उनी सन् १९९३ यता सुडानको राष्ट्रपतिका रुपमा जिम्मेवारी सम्हालेका थिए ।