काठमाडौं– संघीय सरकारको सत्तारुढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल (प्रचण्ड)ले प्रदेश नम्बर २ को पार्टीले जनताको अपेक्षाअनुसार काम गर्न नसकेको आरोप लगाएका छन् ।

सोमबारको जनकपुरधामको बरमझियामा शहीद रामवृक्ष यादवको स्मृतिसभालाई सम्बोधन गर्दै अध्यक्ष प्रचण्डले जनताले गरेको त्याग र बलिदानअनुसारको प्रतिपफल नपाएको पनि बताए ।

‘यो २ नम्बर प्रदेशको सरकारले के–कति राम्रो काम गर्‍यो ? के यहाँ सुशासन शुरु भयो त ? विकासले गति लिन थाल्यो छ ?,’ प्रचण्डले भने, ‘मैले बुझेसम्म त्यस्तो भएको छैन । बरु यहाँ भ्रष्टाचार अझ बढ्यो भन्ने कुरा सुनिएको छ । सुशासन छैन, जनतालाई झन् दुःख बढ्यो भन्ने कुरा सुनिएको छ ।’

अध्यक्ष प्रचण्डले केही समय अगाडि प्रदेश नम्बर २ का मुख्यमन्त्रीसहितको टोली काठमाडौं गएको र प्रधानमन्त्रीको सरकारी निवास बालुवाटारमा प्रधानमन्त्री ओली र आफूसहितको भेटका क्रममा प्रदेश नम्बर २ को समस्याबारे छलफल भएको जानकारी दिए । उक्त छलफलका क्रममा आफूले केही कुरा मुख्यमन्त्रीलाई भनेको पनि बताए ।

अध्यक्ष प्रचण्डले प्रदेश नम्बर २ मा प्रत्येक वर्ष बाढीबाट हुने क्षतिलाई दीर्घकालीन ढंगले नियन्त्रण गर्नका लागि योजना बनाउनुपर्ने आवश्यकता औंल्याए ।