काठमाडौं – तत्कालीन नेकपा एमालेका महासचिव मदन भण्डारी र जीवराज आश्रित हत्याकाण्डमा आधारित फिल्म ‘दासढुंगा २’ निर्माण हुने विषयले केही समयदेखि चर्चा पाएको थियो । निर्माण टिमले अहिले नेकपाकै सरकार भएकाले पनि सरकारी तबरबाट साथ पाउने अपेक्षा गरेको थियो ।

तर राष्ट्रपति विद्यादेवी भण्डारीको आपत्तिपछि यो फिल्म नबन्ने संकेत देखिएको छ ।

मदन भण्डारी र आश्रितको जीप दुर्घटनामा परेर वि.सं. २०५० साल जेठ ३ गते रहस्यमय हत्या भएको थियो । यही विषयमा आधारित रही चलचित्र ‘दासढुंगा’ निर्माण भइसकेको छ ।

यसैबीच निर्माण टिमले भने ‘दासढुंगा २’ छायांकनका लागि बोर्डले इजाजत नदिएको बताएको छ । फिल्मका लेखक तथा निर्देशक कुमार भट्टराईका अनुसार मदन भण्डारी प्रतिष्ठानले फिल्म निर्माणमा असहमति जनाएको बताएका छन् ।

निर्देशक भट्टराईका अनुसार राष्ट्रपति कार्यालयले पनि यो फिल्म निर्माणमा रोक लगाएको छ ।

फिल्मको कथासारले यतिबेला सत्तामा रहेको दल नै कमजोर भएको देखाएपछि राष्ट्रपति भण्डारीले आपत्ति जनाएको स्रोतले जनाएको छ ।

बोर्डका एक सदस्यका अनुसार प्रतिष्ठान र राष्ट्रपति निवासले ‘दासढुंगा २’ को कथामा नै आपत्ति जनाउँदै फिल्म निर्माणमा रोक लगाउन खोजेको छ ।

यता निर्देशकले भने फिल्मका लागि सबै कुराको तय भइसकेको र छाया‍ंकनमा जाने तयारीमा आफूहरू रहेको तर समयमा इजाजत नपाउँदा आफूहरू अन्यौलमा परेको बताएका छन् ।