चितवन– टेलिभिजन पत्रकार रवि लामिछाने यतिवेला जिल्ला प्रहरी कार्यालय चितवलनको हिरासतमा रहेका छन् ।
बिहीवार काठमाडौंस्थित न्यूज २४ को कार्यालयबाट पक्राउ गरि लामिछानेलाई जिल्ला प्रहरी कार्यालय चितवन पुर्याइएको थियो ।
पूर्व सहकर्मी शालिकराम पुडासैनी मृत्यु प्रकरणमा छानविन गर्न भन्दै प्रहरीले लामिछानेसहित तीन जनालाई हिरासतमा राखेको छ । विहीबार चितवन पुर्याइएका उनीहरुमाथिको अनुसन्धानमा थप समय आवश्यक रहेको भन्दै प्रहरीले जिल्ला अदालतमा पेश गरेको थियो । अदालतले शुक्रवार थप अनुसन्धानका लागि भन्दै प्रहरीलाई पाँच दिनको समय दिएको थियो ।
तर, हिरासतमा रहेका लामिछानेसँग प्रहरीले कुनै सोधपुछ र बयान नलिएको समाचार बाहिरिएको छ ।
शालिकराम पुडासैनीले मृत्यु अघि रेकर्ड गरेको भनिएको भिडियोमा आफूले रविसहित अन्य तीन जनाको दवावका कारण आत्महत्या गरेको बताएका थिए ।
मृत्यु अघि गरिने यस्तो घोषणालाई कानूनी भाषामा ‘डाइङ डिक्लिरेसन’ भन्ने गरिन्छ । मृत्यु अघि मानिसले झुटो बोल्दैन भन्ने कानूनी सिद्धान्तका आधारमा त्यसस्ता घोषणाहरुलाई प्रमाणको रुपमा अदालतले प्रयोग गर्ने गरेको छ । तर, यसरी गरिएका घोषणाको छानवीन, जाँच, वयान महत्वपूर्ण मानिन्छ ।
शालिकराम पुडासैनीले रेकर्ड गरेको उक्त भिडियोका आधारमा रविसहितका तीनजनालाई प्रहरीले नियन्त्रणमा लिएपनि उक्त भिडियोमा भनिएको आधारमा रविमाथि प्रहरीले कुनै वयान नलिएको पाइएको हो ।
यसरी बाहिरियो कुरा
लामिछाने पाँच दिनदेखि चितवन प्रहरीको हिरासतमा राखिएका छन् । अब प्रहरीले उनलाई भोलि अदालतमा पेश गर्ने छ ।
उनी हिरासतमा रहेको समयमा कांग्रेसका नेता दिलेन्द्र बडु, रवि समर्थकको तर्फबाट रमेश प्रसाई लगायतले हिरासतमा पुगेर भेटेका छन् र रविले आफ्ना सुभेच्छुक र समर्थकलाई भनेका कुरा बाहिरिएका छन् ।
आफू न्यायको पक्षमा रहेको र प्रहरी अनुसन्धानमा सहयोग गर्न तयार रहेको उनले बताउँदै आएका छन् ।
लामिछानेले प्रसाईसँगको कुराकानीका क्रममा आफ्नो समर्थनमा भएको आन्दोलनमा कुनै राजनीतिक दलको झण्डाको प्रयोग नगर्न र प्रहरीमाथि ढुंगामुढा नगर्न आग्रह गरेका थिए । तर उनले भने अनुसारका गतिविधि भने उनका समर्थकले गरेका छैनन् । प्रहरीसँग रविका समर्थकको झडप भएको छ । प्रदर्शनकारीले प्रहरीको भ्यान फोडेका छन् ।
यसैबीचमा आइतवार नेपाली कांग्रेस निकटको विद्यार्थी संगठन नेपाल विद्यार्थी संघका पूर्व महामन्त्री कुन्दनराज काफ्लेले हिरासतमा रहेका रवि लामिछानेलाई भेटेका छन् ।
त्यसक्रममा लामिछानेले आफू निष्पक्ष छानविनमा सघाउन तयार रहेको बताएका थिए । तर अहिलेसम्म प्रहरीले आफूसँग घटनाबारे कुनै वयान नलिएको बताएको काफ्लेले जानकारी दिए ।
प्रहरीले हिरासतमा राखेको र आरोपी व्यक्तिसँग घटनाको बारेमा वयान लिने गर्छ र सरकारी वकिललाई उक्त वयान, घटनास्थल प्रकृति मुचुल्का, लाशा जाँच प्रकृति मुचुल्का, विभिन्न व्यक्तिको वयान लगायतका विवरणसहितको फाइल पेश गर्छ । जसको आधारमा सरकारी वकिलले अदालतमा मुद्दाबारे बहस गर्ने गर्छन् ।
प्रतिक्रिया