काठमाडौं– राष्ट्रपति विद्या भण्डारीले मुलुकको आर्थिक–सामाजिक समृद्धिको दिशामा परिचालित हुन सबै राजनीतिक दलहरुलाई आग्रह गरेकी छिन् । तेस्रो निर्वाचन दिवसको अवसर पारेर मंगलबार काठमाडौंमा आयोजित कार्यक्रममा बोल्दै राष्ट्रपति भण्डारीले नेपाली जनताले तीनै तहको निर्वाचनमा प्रर्दशन गरेको उत्साह र सहिष्णुताले मुलुकलाई समुन्नतिको मार्गमा अघि बढाएको बताइन् ।

उनले ‘समृद्ध नेपालः सुःखी नेपाली’ को राष्ट्रिय संकल्प संवैधानिक मार्ग चित्र अनुकूल भएकाले अब सबै राजनीतिक दलहरु र सम्वद्ध पक्षले सोही दिशामा केन्द्रित भएर अघि बढनुपर्नेमा जोड दिइन् ।

राष्ट्रपति भण्डारीले लोकतन्त्रलाई अझै सुदृढ बनाउँदै लैजान पनि निर्वाचनको उचित व्यवस्थापनमा ध्यान दिन जरुरी रहेको पनि बताइन् । राष्ट्रपति विद्यादेवी भण्डारीले निर्वाचनलाई स्वच्छ, स्वतन्त्र र मर्यादित बनाउन आवश्यक कानुन र प्रविधिको विकासमा जोड दिन पनि निर्वाचन आयोगलाई सुझाव दिएकी छिन् ।

त्यस अवसरमा उनले तीनै तहको निर्वाचन सम्पन्न गराउन सफल भएकोमा निर्वाचन आयोगको खुलेर प्रशंशा पनि गरेकी थिइन् ।