एजेन्सी– इजिप्टको सेनाले लडाकुविरुद्ध गरेको सैनिक कारवाहीमा १६ संदिग्ध लडाकुको ज्यान गएको जनाएको छ । इजिप्टको सिनाई प्रायद्विपमा उत्तरी भागमा अवस्थित अल अरिश शहरमा सेनाले दुई छुट्टाछुट्टै कारवाही गरि संदिग्ध लडाकुलाई परास्त गरिएको इजिप्टको सरकारी समाचार संस्थाले जनाएको हो ।

समाचार संस्था अल अहरमका अनुसार सेनाले अल अरिश शहरको ओबेइदात क्षेत्रमा गरेको कारवाहीमा १० तथा अबु एइटा क्षेत्रमा गरेको कारवाहीमा ६ जना संदिग्ध मारिएका हुन् । सेनाको कारवाहीमा केही परिमाणमा हतियार तथा अन्य सैनिक उपकरण बरामद गरिएको जनाइएको छ ।

कारवाहीका क्रममा सेना तथा लडाकुबीच झडप समेत भएको जनाइएपनि सेनातर्फ भएको हताहतीको विवरण भने सार्वजनिक गरिएको छैन । सन् २०१३ यता इजिप्टको सेनाले इस्लामिक अतिवादीविरुद्ध युद्ध लड्दै आएको छ । इस्लामिक अतिवादीहरु उत्तरी सिनाईमा बढी सक्रिय रहेको बताइन्छ ।