काठमाडौं–नगर विकास कोषको सहयोगमा बुटबलमा व्यवसायिक भवन बन्ने भएको छ । भवन निर्माणका लागि सोमबार बुटबल उपमहानगरपालिका र कोषबीच सम्झौता भएको छ ।

१० करोड १४ लाख रुपैयाँको लागतमा निर्माण हुने भवनका लागि कोषले ९० प्रतिशत रकम ऋण सहयोग उपलब्ध गराउने छ भने, उपमहानगरले १० प्रतिशत रकम लगानी गर्नेछ। ८ प्रतिशत ब्याजदरमा २० वर्षका लागि ऋण सहयोग प्रदान गरिने कोषका कार्यकारी निर्देशक मनिराम सिंहले जानकारी दिए ।

बुटबल व्यापारिक केन्द्रका रुपमा विकास हुँदै गएको तथा बसपार्क क्षेत्रमा सर्वसाधारणको चहलपहल बढेका कारण व्यवसायिक भवन निर्माण गर्न आफूहरु उत्साही भएको सिंहले बताए ।

पार्किङसहितको भवनबाट बुटबललाई व्यापारिक नगर बनाउन थप सहयोग पुग्ने उपमहानगरका मेयर मेयर शिब सुबेदीले बताए।

कोषबाट लिएको ऋण भवन भाडामा लगाएबापत आएको रकमबाट तिर्दै जाने नगरको योजना छ । ३ बर्षमा निर्माण सम्पन्न हुने भवनमा ६८ व्यवसायिक सटर रहनेछन् ।