काठमाडौं– नेपाल चेम्बर अफ कमर्शले उत्पत्तिको प्रमाणपत्र ( सर्टिफिकेट अफ ओरिजिन ) अब अनलाईन पद्दतिबाट जारी हुने व्यवसथा गरेको छ ।

चेम्बरको सचिवालय काठमाडौंमा शुक्रबार आयोजित एक कार्यक्रममा वाणिज्य तथा आपूर्ति सचिव केदारबहादुर अधिकारी र चेम्बर अध्यक्ष राजेश काजी श्रेष्ठले अनलाइन प्रणालीको शुभारम्भ गरेका हुन् ।

यसबाट निकासी प्रर्बद्धन र व्यापार क्रमशः डिजीटाइजेसन हुनुका साथै निकासी व्यापार सहज, सरल, छिटो र झन्झटमुक्त हुने चेम्बरले अपेक्षा लिएको छ ।

कार्यक्रममा वाणिज्य तथा आपूर्ति सचिव अधिकारीले उत्पत्तिको प्रमाणपत्र जारी गर्दा सो नियमनमा बसी जारी हुने आशा एवं विश्वास व्यक्त गरे । भाद्र १ गतेदेखि पूर्ण रुपमा लागू हुने जानकारी दिँदै उनले यो निकासीको महत्वपूर्ण दस्ताबेज भएकोले कति मूल्यमा कुन अवधिमा निकासी भयो लगायतका विषयको अनुगमन गर्न सजिलो हुने बताए ।

कार्यक्रममा चेम्बर अफ कमर्शका अध्यक्ष राजेशकाजी श्रेष्ठले सरकारले अवलम्बन गरेको डिजिटल इकोनोमि डिजिटल नेपालको अवधारणा अनुरुप नै विदेशी व्यापार जस्तो अत्यन्तै गतिशील क्षेत्रमा अनलाईन सर्टिफिकेट अफ ओरिजिलनको सफ्ट लञ्च हुनु समय सान्र्दभिक रहेको बताए ।

उनले मुलुकको निकासी अभिवृद्धि गर्न र व्यापार घाटा घटाउन कागजातकोे संख्या बढी भयो भन्ने सन्दर्भमा यो अत्यन्तै सकारात्मक भएको बताउँदै यसबाट लागत घट्ने र समयको बचत भई प्रभावकारितामा वृद्धि हुने विश्वास व्यक्त गरे ।

आउदा दिनमा यस्तै निकासीकर्ता सरोकारवालाहरु यसको उपयोग र उपयोगीताबारे तालिमको आयोजना गरी बढी भन्दा बढी निर्यातकर्तालाई छिटोभन्दा छिटो यस प्रणालीमा आबद्ध गर्ने चेम्बरको योजना रहेको छ ।

कार्यक्रममा उद्योग वाणिज्य तथा आपूति मन्त्रालयका सहसचिव, व्यापार तथा निकासी प्रबर्द्धन केन्द्रका कार्यकारी निर्देशक, चेम्बरका पदाधिकारीहरु, निकासीकर्ताहरु र सरोकारवालाहरुको उपस्थिति रहेको थियो ।