काठमाडौं– मनपरी रुपमा तरकारी तथा फलफूलको मूल्य बढाएको भन्दै वाणिज्य, आपूर्ति तथा उपभोक्ता संरक्षण विभागले व्यापारीलाई कारवाही गरेको छ ।

विभागले मनपरी मूल्य बढाउने बल्खु र कालीमाटीका १९ जना तरकारी तथा फलफूलका थोक व्यापारीलाई कारबाही गरेको हो ।

तरकारी र फलफूलको भाउ अत्याधिक रुपमा बढेको गुनासो आएपछि शुक्रबार विहान ३ बजेदेखि ८ बजेसम्म विभागले तरकारी बजारमा अनुगमन गरेको थियो ।

कालिमाटी र बल्खुको तरकारी बजारमा दुई टोली बनाएर गरिएको अनुगमनका क्रममा तरकारी बजार बल्खुका ११ र कालीमाटी तरकारी बजारका ८ व्यापारीमाथि कारवाहीसमेत गरिएको छ । कारवाहीमा परेका व्यापारिलाई ५ देखि २० हजार रुपैयाँसम्म जरिवाना गरिएको छ ।

उनीहरुलाई आवश्यक कागजातसहित सात दिनभित्र विभागमा उपस्थित हुन निर्देशन दिएको कालिमाटी फलफूल तथा तरकारी बजारका निर्देशक तेजेन्द्र पौडेलले बताए ।

कालीमाटीका लागि निरीक्षण टोलीको नेतृत्व गरेका दीपक पोखरेलले धेरै नाफा राखेर विक्रीवितरण गरेको र बिलजिकबिनै कारोबार गरेको पाइएको बताए ।

एक होलसेल व्यपारीले अर्कोलाई बेच्दा ५० रुपैयाँ सम्म नाफा राखेर बेचिएको पाइएको अनुगमन टोलीले फेला परेको थियो ।

बाढी, पहिरो, विषादी परीक्षण आदीको नाममा व्यापारीले अस्वभाविक रुपमा तरकारी तथा फलफूलको मूल्य तोक्दा उपभोक्ता मारमा परेको भन्दै गुनासो बढेपछि विभागले अनुगमन गरेको हो ।