काठमाडौं – यस वर्षको दशैँमा रिलिज गर्ने गरी चलचित्र ‘रातो टीका निधारमा’ को औपचारिक घोषणा गरिएको छ । आइतवार राजधानीको कमलपोखरीस्थित कुमारी हलमा आयोजित एक विशेष कार्यक्रममा चलचित्रको औपचारिक घोषणा गरियो । यो फिल्मसँगै निर्देशक अशोक शर्माले आफ्ना छोरा अंकित शर्मालाई फिल्ममा डेब्यु गराएका छन् ।

चलचित्रमा अकिंत खड्का मुख्य भूमिकामा हुनेछन् । यस्तै चलचित्रमा साम्राज्ञी राज्यलक्ष्मी शाह, नीता ढुङ्गाना, खुश्बु खड्का, राजाराम पौडेल, बुद्धि तामाङ, शिवहरि पौडेल, लक्ष्मी गिरी, बसुन्धरा भुसाल लगायतका कलाकारको मुख्य भूमिका रहनेछ ।

लेखक तथा निर्देशक अशोक शर्माले चलचित्रलाई स्तरीय बनाउन कुनै कसर बाँकी नराख्ने बताए । यो फिल्मको कथा अर्को एक फिल्मसँग मिल्ने देखिएपछि पुनः स्किृप्ट परिमार्जन गर्दा फिल्मको छायांकन मितिमा केही ढिलो भएको उनले बताए ।

कार्यक्रममा कलाकारले दशैँमा जस्तै टीका लगाएर शुभकामना साटासाट गरेका थिए । कार्यक्रममा चलचित्रका कलाकारको परिचय र अकिंत शर्माको परिचय भिडियोमार्फत गराइएको थियो । फिल्म फ्लोरमा जाने तयारीमा छ ।