धनकुटा– धनकुटाको महालक्ष्मी नगरपालिका–२ मारेककटहरेमा छुरा प्रहार गरी एक युवाको हत्या भएको छ ।

शनिबार राति मारेककटहरेस्थित माझगाउँमा लागेको मेलामा महालक्ष्मी–३ डाँडागाउँका २२ बर्षीय सन्तोष थम्फरा लिम्बुको हत्या भएको प्रहरीले जनाएको छ । राति करिव १ बजे भएको झगडाका क्रममा मारेककटहरेका २५ बर्षीय घनेन्द्र लिम्बुले छुरा प्रहार गरी थम्फराको हत्या गरेको धनकुटाका प्रहरी प्रमुख सुरेन्द्र बहादुर गुरुङले जानकारी दिए । हत्या आरोपमा लिम्बुलाई प्रहरीले नियन्त्रणमा लिएको छ ।

डाँडागाउँका स्थानीय गणेश खातीका अनुसार थम्फराको घाँटीमा छुरा प्रहार भएको छ । छुरा प्रहारबाट उनको घटनास्थलमै मृत्यु भएको हो । घटनाको जानकारी पाएपछि आइतबार बिहान प्रहरी घटनास्थल पुगेको थियो । मृतकको शवलाई पोष्टमार्टमका लागि धनकुटा जिल्ला अस्पताल लगिएको छ ।

छुरा प्रहारबाट डाँडागाउँका मनोज लिम्बुखिम पनि घाइते भएका छन् । युवतीका बिषयमा झगडा भएको बताइएको छ । घटनाको बिषयमा थप अनुसन्धान जारी रहेको प्रहरीले जनाएको छ ।