काठमाडौं– सरकारले आगामी बजेटमा वृद्धभत्ता बढाउने भएको छ । चुनावी घोषणा पत्रमा वृद्धभत्ता बढाउने भनेर नेकपाले गरेको प्रतिवद्धता अनुसार आउँदो बजेटमा वृद्धभत्ता बढाउन लागिएको सरकारको प्रवक्ता समेत रहेका सञ्चार तथा सूचना प्रविधिमन्त्री गोकुल बाँस्कोटाले बताएका हुन् ।

मन्त्री बाँस्कोटाले प्यूठानको गौमुखीमा शुक्रबार भएको कार्यक्रममा वृद्धभत्ताको साथसाथै सरकारले जेष्ठ नागरिकको लागि १ लाखको बीमा गर्ने र त्यसको प्रिमियम समेत सरकारले तिर्ने जानकारी दिए ।

उनले सरकारले यो बजेटमा छोराछोरीको कमाइबाट वृद्ध बुवाआमाको खातामा पैसा पठाउनुपर्ने व्यवस्था समेत गर्न लागेको बताए ।

हाल वृद्धवृद्धाले मासिक २ हजारका दरले वृद्धभत्ता पाउँदै आएका छन् ।