नयाँ दिल्ली– पछिल्लो समय विश्वका विभिन्न मुलुकमा विद्युतीय चुरोटका कारण स्वास्थ्यमा पर्ने असरबारे बहस भइरहेको छ ।

विद्युतीय चुरोटका कारण गत अगष्ट २३ मा विद्युतीय चुरोटका कारण एक जनाको ज्यान गएपछि अमेरिकामा विद्युतीय चुरोटमा प्रतिबन्ध लागिसकेको छ ।

हालै भारतले पनि यस्ता किसिमको विद्युतीय चुरोटमा प्रतिबन्ध लगाएको छ । भारतीय मन्त्रीपरिषद्को बुधबार बैठकले भारतभर विद्युतीय चुरोटको उत्पादन, आयात निर्यात, विज्ञापन, ओसारपसार, विक्री र प्रयोगमा प्रतिबन्ध लगाएको हो । पछिल्लो प्रतिबन्धमा विद्युतीय हुक्का समेत सामेल रहेको भारतीय सञ्चारमाध्यमले जनाएका छन् ।

विद्युतीय चुरोटका कारण धूमपान सिक्दै गरेका युवाहरुको व्यवहारमा लगाम लाग्ने भारतीय अधिकारीको अपेक्षा छ । नयाँ नियम अनुसार भारतमा कसैले विद्युतीय चुरोटको विक्री, उत्पादन, आयात निर्यात, विज्ञापन र प्रयोग गरेको पाइएमा पहिलोपटक १ वर्ष जेल सजाय तथा १ लाख रुपैयाँ जरिवाना र पटक–पटक यस्तै गरेको पाइएमा ३ वर्षको जेल सजाय तथा ५ लाख रुपैयाँ जरिवाना सजाय हुनेछ ।

अनुमानअनुसार यस्ता विद्युतीय चुरोटका ४ सय भन्दा धेरै ब्राण्ड बजारमा उपलब्ध छन् । यद्यपि भारतमा भने यस्ता कुनै पनि किसिमका विद्युतीय चुरोटको उत्पादन हुँदैन । त्यस्तै भारतीय बजारमा १५० भन्दा धेरै स्वादका विद्युतीय चुरोट पाइन्छन् ।