काठमाडौं–  सरकारले ५६ वटा जिल्लाका ५ हजार बढि डेंगु संक्रमित रहेको जानकारी दिएको छ । प्रतिनिधिसभाको आजको बैठकमा डेंगु रोगका बारेमा जानकारी दिँदै स्वास्थ्य तथा जनसंख्या मन्त्री उपेन्द्र यादवले ५६ जिल्लामा ५ हजार ९५ जनामा डेंगुको संक्रमण देखिएको जानकारी दिएका हुन् ।  डेंगुका कारण यो वर्ष ६ जनाको मृत्यु भएको समेत मन्त्री यादवले संसदमा जानकारी गराए ।

मन्त्री यादवले नेपालका लागि मात्रै नभएर विश्वकै लागि डेंगुको संक्रमण चुनौती बनेको बताए । नेपालमा २०६१ सालमा पहिलोपटक चितवनमा डेंगु देखिएको मन्त्री यादवले जानकारी दिए । हरेक वर्ष संसारमा २९ करोडमा संक्रमण देखिने गरेको र २० हजारको मृत्यु हुने गरेको तथ्याङ्क समेत यादवले प्रस्तुत गरे ।

एसियाका सबै देशमा डेंगुको संक्रमण देखिएको भन्दै मन्त्री यादवले न्यून रुपमा मात्रै नेपालमा देखिएको भन्दै आपतकालीन स्थितिको घोषणा गर्नुपर्ने अवस्था नरहेको बताए ।

नियन्त्रणका लागि चुनौतीका रुपमा रहेको भए पनि सरकारले नियन्त्रण गर्न सक्षम रहेको मन्त्री यादवले बताए । जापानिज इन्सेफ्लाइटिसको नियन्त्रण गरेको स्मरण गर्दै मन्त्री यादवले हात्तीपाइलेको समेत नियन्त्रण गरेको दाबी गरे ।

मलेरियाको संक्रमणबाट मृत्यु हुनेको संख्या समेत घटेको भन्दै मन्त्री यादवले डेंगुको कुनै औषधी नभएको भन्दै लामखुट्टेको नियन्त्रण गर्न मात्रै सम्भव रहेको बताए । उनले लामखुट्टे नियन्त्रणका लागि स्थानीय सरकार समेतको सहभागितामा काम भइरहेको बताए ।

गतवर्ष डेंगु देखिएका जिल्लाहरुमा लामखुट्टे मार्न‘सर्च एण्ड डिस्ट्रोय’ अभियानका लागि संघीय सरकारले १ करोड ६६ लाख र ६ करोड १७ लाख प्रदेशमा पठाइसकिएको उनले बताए । उनले स्थानीय सरकारहरुले समेत ‘लामखुट्टटे खोज र नष्ट गर अभियान’ सञ्चालन गरिरहेको बताए ।