पोखरा- कास्की जिल्ला प्रहरी कार्यालयले सुनको बुद्धमूर्ति भन्दै बेच्ने तीन जनालाई पक्राउ गरी आइतबार सार्वजनिक गरेको छ ।

दोलखा जिल्ला भीमेश्वर नगरपालिका–१ घर भई हाल काठमाडौँ महानगरपालिका–९ सिनामंगल बस्ने ५२ वर्षीय राजराज शिवाकोटी, गोरखा भीमसेन नपा– १ घर भई न्यूरोड बस्ने ३३ वर्षीय देवकुमार श्रेष्ठ र रामेछाप भङ्गेरी गाउँपालिका ३६ वर्षीय वसन्तबाबु श्रेष्ठले पोखरा महानगरपालिका–८ का पाराश्वर विश्वकर्मालाई सुनको भन्दै अन्य धातुबाट निर्मित बुद्धमूर्ति रु १३ लाखमा बिक्री गरेका थिए ।

प्रहरीले उनीहरुको साथबाट पहेँलो धातुको बुद्धमूर्ति, ड्रिल मेसिन, सुनजस्तो देखिने पहेँलो धुलोसहित पक्राउ गरिएको प्रहरी प्रमुख दानबहादुर कार्कीले जानकारी दिए ।

साउन महिनामा जिल्ला प्रहरी कार्यालय कास्कीमा १ सय ६१ वटा मुद्धा दर्ता भएकामा २ सय ९९ जना पक्राउ परेका छन् । जसमध्ये लागुऔषधका मात्रै १७ मुद्धामा ६६ जना पुरुष र ८ जना महिला गरि ७४ जना पक्राउ परेका कास्की प्रहरीका प्रमुख प्रहरी उपरीक्षक दानबहादुर कार्कीले जानकारी दिए । सो अवधिमा बुप्रिनर्फिन ३३१ थान, डाईजापाम ३३१ थान, फेनेरागन ३३१ थान, गांजा ५.९४ केजी र चरेश १२३ ग्राम बरामद गरिएको छ ।

प्रहरीको सक्रियतामा अनुमानित ६३.५ क्वीन्टल गाँजा फडानी गरिएको छ । जुवातास खेलिरहेको अवस्थामा पक्राउ परेका ८४ जनाबाट नगद रु.५ लाख ८० हजार ८ सय बरामद समेत गरिएको कार्कीले जानकारी दिए।