एजेन्सी– जापानको क्योटोस्थित चारसय वर्ष पुरानो एक बौद्ध गुम्बामा मानिसलाई नभई रोबर्टलाई पुजारीका रुपमा खटाइएको छ । यो रोबर्टले गुम्बामा पूजाआजाका लागि आउने दर्शनार्थीलाई दया र करुणा सम्बन्धी सन्देश दिने गर्दछ ।

गुम्बामा रहेका अन्य पूजारीले पूजारी रोबर्टलाई सहयोग गर्ने गर्दछन् । कृत्रिम इन्टेलिजेन्सका माध्यमबाट यो रोबर्ट भविष्यमा अझ बुद्धिमान हुने अपेक्षा गरिएको छ ।

यसअघि गुम्बामा रोबर्टलाई पूजारीका रुपमा राख्ने विषयमा निक्कै विवाद भएको थियो । यद्यपि, पूजारीहरु तथा स्थानीयबासी सहमत भएपछि रोबर्ट राखिएको हो ।

कहिल्यै मर्ने छैन, बरु समयसँगै सुदृढ हुनेछ

कोदाइजी गुम्बाका पूजारी थेनसे गोटोले यो रोबर्ट कहिल्यै नमर्ने बताएका छन् । उनले भने, ‘बरु समय बित्दै जाँदा यसले आफूलाई थप सुदृढ गर्ने छ । समयसँगै चल्ने छ । र, निरन्तर आफ्नो ज्ञानलाई वृद्धि गर्नेछ ।’