टेगुसिगाल्पा– ल्याटिन अमेरिकी मुलुक होण्डुरसमा फुटबल खेलका बेला दुई क्लबका समर्थकबीच भएको झडपमा ३ जना मारिएका छन् ।

राजधानी टेगुसिगाल्पामा रहेका दुई क्लबहरु मोटागुआ र ओलम्पिया क्लबबीच हुन लागेको खेलअगाडि समर्थकबीच हिंसा मच्चिएको हो । हिंसाका क्रममा अरु १० जना घाइते भएका छन् ।

राष्ट्रिय रंगशालामा हुन लागेको खेलअघि समर्थकको भीडले मोटागुआ क्लबका खेलाडी बोकेको बसमा ढुङ्गामुढा प्रहार गरेका थिए । समर्थकले प्रहार गरेको ढुङ्गामुढाका क्रममा तीन खेलाडी घाइते भएका थिए ।

त्यसपछि रंगशालामा दुबै क्लबको समर्थकबीच हिंसा मच्चिएको थियो । दुबै क्लबका समर्थकले छुरा र बन्दुकले विपक्षी समर्थकलाई आक्रमण गरेका थिए । आक्रमणमा ७ जना घाइते भएका थिए । घाइतेमध्ये तीन जना गम्भीर अवस्थामा छन् ।

रंगशालामा हिंसा भड्केपछि प्रहरीले अश्रुग्यास प्रहार गरेको थियो । त्यसपछि रंगशालाभित्रै भागदौड मच्चिएको थियो । हिंसा नरोकिएपछि आयोजकले खेल रद्द गर्नुपरेको थियो ।