एजेन्सी– बंगलादेशमा भीषण आगलागी भएको छ । बंगलादेशको राजधानी ढाकास्थित एक बस्तीमा आगलागी भएको हो । आगलागीबाट ५० हजार बढी घरबार विहीन बनेका छन् ।

आगलागीबाट १५ हजार भन्दा बढी घर जलेर खरानी भएका छन् । प्लास्टिकका छत भएका अधिकांश घरहरु भएका कारण आगो नियन्त्रणमा लिन मुस्किल भएको अधिकारीहरुले बताएका छन् ।

आगलागीबाट केही मानिस घाइते भएको जनाइए पनि अहिलेसम्म कसैको ज्यान नगएको जनाइएको छ । आगलागी भएको इलाकामा अधिकांश मजदूरहरुको बस्ती रहेको थियो । आगलागी के कारणले भएको हो, यसबारे केही खुलाइएको छैन ।

आगलागीको कारणबारे प्रहरीले अनुसन्धान जारी राखेको छ । आगो नियन्त्रणमा लिनका लागि दमकल, प्रहरी र स्थानीयलाई ६ घण्टा भन्दा बढीको समय लागेको थियो ।

आगलागी प्रभावितहरुलाई सरकारले तत्कार राहत र उद्धारको व्यवस्था गर्ने जनाएको छ । आगलागीबाट घरबार विहीन बनेकाहरु रात कसरी बिताउने भन्ने चिन्तामा रहेका छन् ।