काठमाडौं– सशस्त्र प्रहरी बलले स्रोत नखुलेको ४१ लाख ८५ हजार २ सय ८७ रुपैयाँ सहित दुई जनालाई पक्राउ गरेको छ ।

सशस्त्र प्रहरी वलको नेपाल गुल्म हेड्क्वार्टरको रुपन्देही नम्बर ३८ गुल्मबाट खटिएको टोलीले चेकजाँचका क्रममा रुपन्देहीको डण्डाबाट रकमसहित दुई जनालाई पक्राउ गरेको हो ।

सशस्त्रका अनुसार पक्राउ पर्नेमा गुल्मी रुपाकोटका चन्द्रकान्त पौडेल र भारतमा घर बताउने सोमै धवल छन् । सशस्त्र प्रहरीका अनुसार भारतबाट नेपालतर्फ आउँदै गरेको यूपी ५६ टी ३०७१ नम्बरको भारतीय टोयोटा कारमा जाँच गर्दा उक्त रकम बरामद् भएको हो ।

उनीहरुलाई सोधखोज गर्दा बरामद रकमको स्रोत खुलाउन नसकेपछि पक्राउ गरेको सशस्त्र प्रहरीले जनाएको छ । सशस्त्र प्रहरीले पक्राउ परेका दुवै जनालाई आवश्यक कारबाहीको लागि जिल्ला प्रहरी कार्यालय रुपन्देहीमा बुझाएको छ ।